Kennsla í grunnskólum:


Engjaskóli

Námsgreinar eru:

Gítar
Píanó
Þverflauta
Fiðla

Tónskóli Hörpunnar hefur gert samkomulag við Engjaskóla um að veita nemendum hljóðfærakennslu innan veggja grunnskólans að morgni dags.
(Sjá samkomulagstextann)

Markmið
Markmið með þessu fyrirkomulagi er að koma til móts við börn sem eiga um langan veg að fara að sækja tónlistartíma, svo og þau börn sem annars færu á mis við þann möguleika að mega stunda hljóðfæranám á grunnskólaárum sínum.

Kennsluaðstaða
Kennsluaðstaða til hljóðfærakennslu í grunnskólunum er mismundandi.  Grunnskólar í Reykjavík eru ekki byggðir með það í huga að veita hljóðfærakennslu þar innan veggja.  Á síðustu árum hefur skilningur skólayfirvalda farið vaxandi á því að hljóðfærakennsla á grunnskólatíma sé raunhæfur kostur og að hluti af starfsemi tónlistarskólanna geti farið þar fram.  Með góðum vilja og áhuga skólastjóra og kennara grunnskólanna fer þessi kennsla nú fram og er vonast til að hún megi þróast þannig að kennsluaðstaðan verði með tímanum betri og öruggari og að samvinna tónlistarkennaranna og grunnskólakennaranna megi vaxa og þróast, en gagnkvæmur skilningur á starfshögum er nauðsynlegur til að hljóðfærakennsla geti farið fram á grunnskólatíma.

Hljóðfærin
Tónskóli Hörpunnar leitast við að kenna á öll þau hljóðfæri sem nemendur hafa áhuga fyrir.

Fyrirkomulag námsins
Fyrirkomulag námsins innan veggja grunnskólans er það sama og hjá þeim sem sækja tíma í tónlistarskólanum að Bæjarflöt. (Sjá nánar: Námið)  Nemendur eru sóttir í hljóðfæratíma og tímataflan er breytileg (höfð "fljótandi") þannig að fjarvera nemenda komi ekki niður á einstökum fögum grunnskólans.

"Músikkalskt par"
Tónskóli Hörpunnar og Engjaskóli gerðu með sér samning um að vinna að tónlistarverkefni, sem Menntasvið Reykjavíkurborgar stofnaða til á milli nokkra tónlistarskóla og grunnskóla.  Verkefnið, sem kallað var "Músíkkalskt par" fór fram á skólatíma og skyldi lita starf grunnskólans.  Tónskóli Hörpunnar lagði til starfsmann, sem mætti einu sinni í viku til verkefnisins.  Skólarnir komu sér saman um hvaða verkefni skyldu tekin fyrir og miðuðust þau við þarfir grunnskólans og þær aðstæður sem uppi voru. Dæmi um verkefni í grunnskólum eru: Samspil, æfing rokkhljómsveitar, kórsöngur, uppsetning söngleiks, hljóðfæraleikur og söngur á árshátíð o.sv.fr.  Verkefnið var samvinnuverkefni tónskólans og nokkurra grunnskóla og komu þar að, auk starfsmanna Tónskóla Hörpunnar kennarar grunnskólanna.
Umsjónarmaður verkefnisins í Engjaskóla veturinn
2007-2008 var Kristín Kristjánsdóttir.  Fyrstu verkefnin hafa verið tónlist í leikritum og söngur.
Umsjónarmenn verkefnisins veturinn 2008-2009 voru Svanhvít Sigurðardóttir og Ingird Örk Kjartansdóttir.